往年公文袋對外籌款，都維持喺一百萬元水位，○九年籌到一百三十萬元，但今年三月底嘅大型電影籌款，撞正公文袋啱啱公布同社民連發動「五區公投」，籌款數字直線下滑，跌到得番二十萬元。事實擺在眼前，大量有米支持者因不滿「公投」而離棄公文袋。

喺「五區公投」後，政界有傳公文袋出現退黨潮，但黨高層對外宣稱黨員人數冇大變化。呢句話半真半假啦，事關黨內有唔少中產同專業嘅傳統支持者紛紛求去，換嚟嘅係一啲意識形態激進嘅後生仔加入，一減一加，只係玩數字遊戲。

早前有「一個多年來與公民黨風雨同路的人」喺多份報章登廣告，批評公文袋高層喺「五區公投」失敗後嘅閃縮表現，初時黨內高層質疑係咪建仔搞事，但後來呢位「風雨同路人」再登廣告，列出自己係公文袋黨員嘅證據，黨內好多人都知呢位仁兄確有其人，而且仲一直係公文袋嘅大水喉，大家嗰時至知大鑊。

有消息指黨內依家批人離心好大，甚至想轉投白鴿黨，只係政改大戰風頭火勢，暫按兵不動，到十月中委會改選，或會出現巨大退黨潮，剩低嘅就係班激進分子，走社民連條舊路。