香港友好協進會上禮拜四喺會展筵開一百一十席，慶祝成立二十一周年。揸旗嘅全國政協常委陳永棋喺政商界人脈廣，城中大孖沙畀面到賀，更喺背後「發功」，為「友協」籌得三千萬元經費。
呢筆錢對友協意義重大，事關去年遇着金融海嘯，撲水有難度，友協去年籌款經費唔夠一千萬元，搞到晚宴要揼富豪心口。今年經濟好轉，富豪荷包脹卜卜，即時「科水」表心意。
友協會長陳永棋帶頭捐五百萬元；信和置業主席黃志祥亦拍住上，豪捐五百萬元；「零食大王」戴德豐、玩具大王蔡志明同洪祖杭各捐三百萬元；另一全國政協委員盧文端捐二百萬元；「深圳王」黃楚標都唔輸蝕，捐五十萬元，加埋其他善長合共籌得三千萬元。棋哥力挽狂瀾，功不可沒也！
工作咁忙，棋哥早前去倫敦度假兩個禮拜充電。佢笑言此行做咗囡囡管家，每日接孫女返幼兒班，又幫囡囡買餸，跟住做埋司機送孫女參加課外活動，雖然忙，但諗起都心甜。