旅議會正視事件，清理門戶，梗係好事，不過咁，釘牌係咪真係可以防止同類事件再次發生，太一叮有啲懷疑。記得○七年，中央電視台記者放蛇直擊，踢爆本港黑店劏客內幕，港府事後亦曾煞有介事打擊一輪，拉人封舖，但係無幾耐，黑店改頭換面，換個招牌，咪又係繼續劏客。今次旅議會「嚴懲」不良旅行社，會唔會又係虎頭蛇尾？

道高一尺，魔高一丈，旅議會將不良旅行社釘牌，做法雖然值得肯定，但如果以為咁就可以解決問題，就真係太傻太天真啦。呢，今年一月到五月，旅議會接獲內地旅客嘅投訴比去年同期激增八成六，黑店遍地開花，宰客歪風禁之不絕，反映當局對旅遊業嘅監管漏洞百出，單靠旅議會單打獨鬥，政府部門作壁上觀，根本無法解決問題。

其實，不良旅行社同黑店聯手劏客，已經係公開嘅秘密，而佢哋嘅劏客手法來來去去都係嗰幾味，一係貨不對辦，一係以次充好，一係以假亂真，斬到旅客一頸血。內地網上流傳一部《旅遊秘笈》，詳細描述香港黑店巧取豪奪、坑蒙拐騙嘅無良手法。講真吖，連內地人都睇到，港府無理由睇唔到，問題係肯唔肯做嘢，只要佢哋肯上心，黑店又點可能開到成行成市，由紅磡開到去西九龍吖。

執法者放軟手腳，監管制度七國咁亂，表面上，同旅遊業相關嘅監管機構，就有官方嘅旅遊事務署、半官方嘅旅發局同民間嘅旅議會，對於業內嘅不良銷售行為，消委會亦有責任跟進，一旦涉及刑事，警方同海關亦有份調查。衙門就多啦，可惜權責不清，各自為政，卒之搞到「多王管即係無王管」，不法之徒唔乘虛而入就奇啦！

野火燒不盡，春風吹又生。正如有旅遊業人士指出，當局想改變業內嘅畸形生態，必須全面檢討，大刀闊斧改革，統一監管制度，將劏客歪風連根拔起，如果唔係，香港購物天堂嘅金漆招牌遲早保唔住，叮！