小白觀點：硬碟有不可告人秘密

明愛醫院閉門失竊，光天化日畀人撬走硬碟，據講涉及超過三千個眼科病人病歷記錄同資料。公僕唔見記憶手指，基本上唔算係新聞，之但係醫院有咁多貴重嘢，門口泊滿晒醫管局高層嘅波子法拉利，賊佬竟然特登吼硬碟，你話冇可疑咩，真係打死都唔信。依家電腦硬碟好貴咩？政府雖然專買貴嘢，但係貴極都唔會鑲金㗎！放上拍賣網冇市場，拎去大押實畀掌櫃踢番出嚟。好明顯當中有啲不可告人嘅秘密，話唔定係有人想掩飾某啲真相。

恕小白老弟大膽假設，會唔會係眼科病人自爆睇見煲呔曾同成班高官做騷，睇到「眼火爆」呢？又或者因為時薪得十幾蚊，一日要做十幾個鐘，做到「眼擎擎」？定係睇到小朋友郁啲就光天化日打野戰，睇到「眼冤」呢？實情係點，都係留番畀讀者自己判斷。

Email：sunsiupak@gmail.com

Blog：http://sunsiupak.blogspot.com

阿豪觀點：明愛爆鑊卸膊有前科

明愛醫院又有新聞。呢，之前咪發生咗一單見死不救事件嘅，個急症部門主管最近打甩咗，唔使受處分；眼科部門一部存放喺已經上鎖房內，等待銷毀嘅電腦硬碟機又不翼而飛，硬碟內三千幾名眼科病人嘅資料唔見咗……嘩！仲有邊個敢去明愛求醫呀？

明愛再賴嘢，老實講豪伯一啲都唔覺得出奇，令人百思不得其解嘅，反而係明愛喺事發八日之後，先至報警求助，同埋通知個人資料私隱專員公署。哈，佢哋可能冇聽過「一件污、兩件穢」呢句說話，其實之前都已經衰過咁多鑊，咪又係冇人要問責執包袱！如果我係佢哋，索性卸膊到底，唔單止一早公告天下，話唔見咗病人資料，仲要強調唔保證下次唔再犯，病人都係自己將資料備份啦，反正呢種惡人先告狀嘅惡劣態度，淫賤傳媒早有先例㗎啦！

Email：lukchiho75@hotmail.com

Blog：http://lukchiho.blogspot.com

網友觀點……

老鼠強：部機九成畀人偷咗啦，去鴨寮街睇吓搵唔搵得番。

金田七：可疑人物唔難搵，唔會好多人能入得去上咗鎖嘅房吖……

單眼佬：明愛醫院咁搞法，點畀到病人信心呀？

病人：成間醫院啲員工道德好有問題，建議將所有人炒晒，重新招聘。