成功人士個個都有啲秘訣，保良局總理、外號「快勞夾（file）大王」嘅國際文具集團主席兼行政總裁杜振源（Simon）係成功嘅企業家，但佢素來低調，唔講唔知，佢當年創業皆因一個刻薄嘅老闆。
當年佢喺一間公司做廠長，年尾夥計等出雙糧，但老闆一味拖。到最後一日，佢硬着頭皮入房同老闆爭取，最後老闆終於肯出雙糧，但全公司唯獨Simon同佢助理無份，無癮之下劈炮唔撈自行創業，經營至今做出驕人成績，坐擁全球五成快勞夾生意，成為跨國企業。咁係咪要多謝以前個老闆？Simon話：「都係㗎，有次喺馬場遇到以前個老闆，都有上前握手多謝佢！」
Simon係馬主，早前佢嘅愛駒「按得快」贏頭馬，加埋為未來新抱Vivian慶祝生日，佢同太太、愛兒杜擴業到法國餐廳Gaddi's晚宴，仲請來前經濟發展及勞工局局長葉澍堃一家四口作客。Simon自備咗五支靚葡萄酒，其中三支係透過拍賣投得、由布根地「酒神」Henri Jayer主理嘅頂級法國紅酒，包括1990年Vosne Romanee Cros-Parantoux、1978年Echezeaux及1988年Vosne-Romanee，總值十多萬元。