本文重點
政改方案進入緊張關頭，尋日形勢豁然開朗，由一眾溫和民主派組成嘅普選聯更高調開記者會表示支持。不過，事件有個小插曲，成員之一嘅民協主席廖成利（老虎仔）喺記者會前已經得知中央開綠燈，佢仲把玩自己部BlackBerry（黑莓）手機，向記者展示呢個絕密消息嘅短訊，唔知咁樣算唔算洩露咗國家機密呢？
「北京已接受民主黨方案」
老虎仔尋日同另外兩個普選聯成員喺中環食飯，佢攞部手機㩒吓㩒吓，期間忽然收到個短訊，呢個短訊仲有好消息添，佢唔知係咪喜上心頭，喺餐廳度向我哋展示呢個國家機密，之後又喺下午嘅普選聯記者會上再次公開展示。短訊內容話：「Dear Bruce（廖成利英文名），剛得悉北京已接受民主黨方案，今次政改，能與你等並肩作戰，戰至最後一兵一卒，幸甚！爭取極終（終極）普選，未來仍需努力！××拜謝！」
原來個短訊係有人通知佢，中央已經接納咗民主黨嘅方案喇！佢話呢個消息十分之可靠，之後出席記者會都充滿信心。老虎仔有絕密料已經唔係第一次，早排盛傳立法會表決政改嘅時間，老虎仔又係未卜先知咁，喺四月中已預知政改會喺六月二十三日進行表決，當時距離立法會五區補選仲有成個月時間，今次又有短訊為證，睇嚟老虎仔真係搭通天地線噃。