撐政改大遊行舉行前，有團體被踢爆搞廉價海鮮餐吸引市民撐政改，尋日大遊行，海鮮餐梗係焦點之一，建仔主席譚耀宗喺集會上當住近十萬人高聲反問：「我哋唔係為海鮮餐而嚟，係為民主而嚟，係唔係？」台下傳嚟一片「係」聲，聲勢浩大，呢招學自台灣嘅宣傳招式移植嚟本港，效果似乎都幾好噃。
尋日遊行前，傳媒大兵集結鯉魚門一帶嘅海鮮食肆，更有媒體追訪阿公阿婆花三、四十蚊就食到白灼蝦、蒸元貝等大貴價食品，又攞啲二○一二年立法會增加幾多席嚟問一把年紀嘅長者，大遊行嘅形象真係幾負面。
或者係咁，譚Sir同工聯會嘅高層就落力消毒，據講，尋日呢一招係學自台灣，即台上嘅有心講者以發問形式講出答案，台下人士只需有理冇理都應一句「係」就得，幾萬人講一個字，想唔夠聲勢都難啦。