打咗太古三十三年工嘅陳南祿（Philip）下個月過檔恆隆，太古系嘅同事近日忙住幫佢搞餞別宴，早幾日，輪到國泰嘅高級經理同佢食飯，做東嘅人係現任國泰行政總裁湯彥麟，地點就揀咗美心集團旗下、曾獲米芝蓮推介嘅洞庭樓度搞。
國泰啲高級經理經常要周圍飛，今次歡送舊同事，就趁住每三個月一次嘅高級經理聚會一齊搞，駐守海外嘅同事都返嚟食飯，結果要開足十一圍至坐得晒。Philip特別揀咗每席盛惠四千二百蚊、名為「良朋歡聚宴」嘅套餐，仲唔食魚翅，唔怕畀啲保育團體抽秤。
班舊同事仲攞咗好多Philip嘅舊相出嚟，畀大家緬懷吓昔日工作點滴。有同事更為佢作咗首七言詩，八句詩嘅頭一個字串埋就係「祝陳南祿健康快樂」，入面仲嵌入咗「美心」、「太古」、「國泰」、「港龍」、「海洋」、「快馬」同「恆隆」等Philip過往任職過同即將轉投嘅公司名，相當有心思。