借facebook為辯論補鑊

大遊行舉行前已經有風聲話政府高層會亮相，下晝四點零，二十幾個高官抵達會場，除咗煲呔曾外，仲有啱啱放完兩日假嘅財爺鬍鬚曾、被人質疑冇撐政改嘅行會召集人梁振英，同教育局局長孫明揚、保安局局長李少光、民政事務局局長曾德成、中央政策組嘅劉兆佳等。

佢哋被安排喺台上一字排開，之後由大聯盟嘅參與團體負責人喊話，建仔主席譚耀宗、富貴黨主席劉健儀輪流發言，佢哋嗌口號時表現得好激情，但企第一排嘅高官就好斯文、嘴郁郁咁和應吓。最搞笑嘅係煲呔曾，佢被安排壓軸發言，其他政黨領袖同行會成員發言時，煲呔曾唔知係心不在焉定冇心機，只顧把玩手中嘅「拍拍手」，搞到「拍拍手」散埋，佢要踎低執番再砌過。搞咗半個鐘，一眾問責高官就急急腳散咗，遊行撐政改？佢哋冇份㗎。

近排曝光過度嘅煲呔曾尋日都喺社交網站facebook上載咗一條兩分幾鐘嘅短片，又講起錨嘅船航去邊，又講政改方案係一份群體功課，呢啲問題都係日前曾余辯時，佢被余若薇問起但答唔到嘅內容，煲呔曾好明顯借facebook補鑊，為自己嘅失敗辯論再補交功課，只係咁樣賊過興兵、喺網上做獨腳戲，可以游說到邊個呢？