當局牛皮吹到咁勁，實際又點呢？講出嚟又係得啖笑。近幾年，香港院校話就話有唔少外地學生入讀，但多數係內地嚟嘅，名義上係國際化，其實係內地化。亞洲教育樞紐名不副實，當局乜面都冇晒，於是惟有出招補鑊。教育局高官日前率領高等教育代表團去印尼、馬來西亞推銷教育產業，希望可以挖掘優材生來港讀書，可惜出盡法寶都鬥唔過老對手新加坡，短兵相接，三兩回合就敗下陣來。

例如，有一個成績名列前茅嘅新加坡國立大學物理系畢業生，原先已透過香港博士研究生獎學金計劃申請入讀本港院校，點知新加坡院校隨即出招，將佢留住。冇錯，港府推出嘅博士研究生獎學金計劃本來幾吸引，每名研究生每月可獲兩萬元津貼，每年仲有一萬元會議、活動同交通津貼。但點解仲吸引唔到呢位優材生呢？無他嘅，人望高處，水往低流，新加坡院校提供嘅條件比香港更優厚，人哋自然棄港投星啦。

其實唔淨只係錢嘅問題，香港好多方面都比唔上新加坡。先講學生宿舍，新加坡院校嘅學生宿舍優先提供畀留學新生，住宿條件不知幾好。反觀香港，外地學生有個豆腐膶咁大嘅地方落腳都算執到嘞。

仲有語言問題，香港整體英文水準比唔上新加坡，吸引力自然大減。喺香港，英文本來唔應該成為問題，可惜政府阿茂整餅，冇嗰樣整嗰樣，教學語言改來改去，一時母語教學，一時又微調，卒之搞到學生中英文都唔湯唔水，外地優材生肯來至奇吖。

更得人驚嘅係，近年香港不時傳出外地留學生自殺事件。呢，今年三月份，中文大學有一個來自廣西嘅女研究生喺宿舍上吊，事件唔止震驚香港，連內地官方傳媒亦發表文章，批評港府一心打造亞洲教育樞紐，搞高等教育大躍進，但就忽視人文關懷，唔幫助非本地生融入社會，外地學生學業或生活有困難時求助無門。叮，如果你係外地學生家長，見到咁嘅情形，仲敢唔敢畀仔女嚟香港讀書呀！

一句講晒，打造教育產業，唔係嗌幾句口號，預留幾塊地就得嘅，香港硬件同軟件都比唔上新加坡，同歐美國家就更加冇得揮，又點樣發展教育產業呀！

唔好話太一叮潑冷水，香港搞教育產業，直情係未學行先學跑。係人都知，香港教育問題多多，尤其基礎教育更係七國咁亂，回歸以來，教育改革一波接一波，學生淪為白老鼠，教學質素每況愈下。當局連基礎教育都搞唔掂，仲吹水要搞乜嘢教育產業，簡直笑死人。

俗語話，冇咁大個頭，唔好戴咁大頂帽，政府與其空喊口號誤人子弟，倒不如老老實實做番啲實際嘢，將基礎教育執番掂先啦。