小白觀點：應潑婦罵街式反擊

煲呔曾牙斬斬撩余若薇辯論，本來大家都估佢輸硬，但勢估唔到會輸到咁難睇！人生得矮不特止，面口又黑，余若薇對住佢，好似家姐教細佬咁，聽聞辯論後反對政改方案嘅人仲多咗添，煲呔曾曲線幫政改倒米，真係唔話得喎。

小白老弟一早話咗煲呔曾係無間道㗎啦，查實要贏呢場辯論容乜易吖，反正絕大部分香港人對政改都係矇查查，使鬼咁認真答咩，只要活用潑婦罵街嘅秘技已經夠用。

嗱，當余若薇一開口話：「行錯一步就返唔到轉頭！」睬佢都有味，連隨嘴藐藐駁嘴駁舌話：「我睬瘟揚過你呀！」如果余小姐仲唔知驚，再敢講多一句：「你冇做好你份工！」嘿，煲呔曾即刻撩鼻屎一嘢彈落佢塊面度，以點數擊敗阿姐之餘，再爆句：「閘住反彈冇回頭！」嘩，咁就精彩咯，如果有埋3D，我寧願睇呢場辯論，都好過睇假假哋嘅世盃肥皂劇。

Email：sunsiupak@gmail.com

Blog：http://sunsiupak.blogspot.com

阿豪觀點：玩鋪勁變咗一鑊粥

曾余辯完咗，大家點睇？覺得邊個表現好啲？對政制向前發展又有冇幫助呢？睇番賽後評論，一面倒認為煲呔曾被技術性擊倒。

有人根據民調嘅評分，形容今次煲呔曾係以1:7大比數不敵大狀，呢個比數，仲大過幾乎同時舉行嘅南韓對阿根廷。連煲呔曾自己都係咁睇，話辯論雙方實力懸殊，佢「連半場都過唔到」，仲自嘲話連老婆都笑佢辯才唔掂，連佢都拗唔贏。咦，咁就奇怪嘞，明知係咁，當初點解又要懶係威咁下戰書呢？所以話，本報頭版大字標題話「曾蔭權自取其辱」，真係一啲都冇講錯！

用煲呔曾同南韓隊比較，似乎對人哋唔係好公平，起碼南韓隊今屆已贏過一場，未至於交白卷，而煲呔曾上任咁耐一事無成，話「玩鋪勁」又變咗一鑊粥，咁樣貶低太極足球，小心南韓領事抗議呀！

Email：lukchiho75@hotmail.com

Blog：http://lukchiho.blogspot.com

網友觀點……

老趙：特首明益公民黨畀佢哋攞彩，同邊個辯論結果都會係咁！

無間道：其實曾生是公民黨擺喺政府裏面條針，專責幫政府倒米。

觀眾B：如果搞咁多嘢都通過唔到，使唔使加多場跳樓騷呢？

C朗：好心煲呔曾有啲自知之明啦唔該！