19/06/2010

播放本新聞相關短片

政情:C18起錨 前綫冚旗

政壇風起雲湧,立法會廠商會代表林大輝秘密籌組嘅「C18」(社區18)地區聯盟快將面世,並定於二十九號喺林大輝中學禮堂舉行成立儀式酒會,屆時仲會請民政事務局局長曾德成同中聯辦副主任周俊明主禮。另一邊廂,劉慧卿一手湊大嘅前綫,已被政府刊憲取消有關政團嘅標誌登記,意味佢嘅歷史任務已經完結。前綫早喺卿姐加入白鴿黨時已經冇影,依家連標誌都冇埋,真係夠晒徹底。

大輝喺自己間中學搞酒會,有「C18」成員覺得唔應該喺中學搞政治嘢,亦有成員估計大輝想騷吓自己間直資中學喎!成立酒會請柬有個心形標誌,大輝話,個組織以香港為根、以社區為家,心繫民生事務、心繫社區事務。張請柬除咗列出大輝在內嘅三十五名區議員成員名單外,仲有四名顧問成員,包括廠商會會長黃友嘉同「五散人」除咗陳茂波之外嘅其他三散人。

「C18」敲鑼打鼓嘅同時,政府憲報尋日都披露,兩個政團申請將政團標誌納入選票上嘅候選人詳情,包括經濟動力同西九新動力。睇嚟,佢哋都磨拳擦掌,準備未來嘅選舉。