Eva大談數據之餘，都推銷本港到處有天橋，市民唔使捱日曬雨淋，仲用自己由上海返香港為例，話只要佢步出香港機場，就可以搭機場鐵路去中環，再經天橋網行返辦公室，期間完全唔使橫過馬路同搭車。呢個比喻生動又貼身，與會人士難免被佢打動。

不過，佢跟住講到香港面臨嘅挑戰時，就拋出啲嚇人嘅數據，話到咗二○三九年，本港人口將達八百九十萬人，但公共交通運輸網就未必追得上，到時點樣應付咁多人口？佢直言有困難。一邊為香港塗脂抹粉，一邊就嚇驚人，到底Eva賣乜嘢藥㗎？