世界盃開鑼後，城中到處都聽到講波聲，尋日馬會主席陳祖澤（John）出席科大榮譽院士頒授典禮，都心情靚靚咁講吓波，講到近排賽事頻頻爆冷，阿John先為愛隊巴西只贏北韓一球解吓畫，跟住就哈哈哈。點解心情咁好？佢笑而不答。梗係啦，咁多強隊都爆冷輸波，阿John揸莊嘅馬會又係最大莊家，畀佢哋贏晒啦，唔笑就出奇囉。
阿John尋日話，佢都有睇前晚兩場波，講到阿根廷大炒南韓四比一，佢好開心咁話打得唔錯。至於法國對墨西哥嗰場佢就冇睇到，但知法國輸咗○比二，佢覺得法國今年冇冠軍相，所以輸都唔出奇。
咁佢嘅愛隊又點呢？佢話，巴西只係踢咗頭一輪，好似魚生粥咁僅僅熟就夠啦。今屆世界盃各支勁旅都已經落咗場，強隊表現差強人意，二線球隊嘅表現似乎仲好啲，咁樣爆冷法，球迷就慘啦，但阿John一樣咁開心。呢頭講完，尋晚德國又以○比一輸畀塞爾維亞，滿地眼鏡碎片，難怪做莊嘅阿John笑到哈哈聲啦。