按上屆經驗，出席省市領導宴會慣常要執到正，點知嗰日朝早出發後，大家至獲悉要着低碳裝，即係環保裝束，唔打領呔、着淺色恤衫同西褲。團友裏面，除咗身兼團長嘅全國青聯副主席黃英豪同曾智雄、顧問曾智明着啱服飾外，其餘個個都要臨時除低領呔同西裝褸。

好似隨團嘅中聯辦副主任王志民及青年部副部長李薊怡、霍啟剛、莊士集團太子爺莊家彬、香港青聯主席陳仲尼同駿豪集團副主席朱鼎健都好狼狽，就連由北京趕去天津參加午宴嘅菁英會創會主席施榮忻亦要急急變身。張高麗提及過去喺唔同省市工作時認識咗好多二代嘅長輩，希望大家轉達佢嘅問候，特別係認識多年嘅前全國人大常委曾憲梓。