煲呔曾尋日出席一個午餐會時再推銷政改，啱啱開波，佢就懶風趣咁話：「有人同我講，呢場辯論好似尋晚（十七號）世界盃阿根廷打南韓隊咁，賽果反映雙方實力差好大。」台下傳嚟竊竊笑聲時，佢跟住話：「但我太太話，人哋南韓都打過半場啦，你都未過到去……」呢個時候台下直頭有掌聲，煲呔曾好有反應咁講：「（太太）佢仲話，（連）我你都嗌交嗌唔贏，點嗌得贏余若薇議員？」

佢呢番話講得好大度，仲抬出太太踩自己，為前日嘅敗北打圓場，不過聽真啲，佢嘅比喻暗示咗辯論係同女人嗌交，佢一個堂堂大男人嗌交嗌唔贏女人，何醜之有呢？煲呔曾雖然以不斷自嘲去解圍，但政界嘅人對佢無間道、有心拉抬反對聲音嘅批評再起。據講親中陣營質疑，煲呔曾平時雖然不濟，但都不致畀余若薇狂砌一粒鐘冇還手之力，唯一解釋係佢藉慘敗扭轉政改方案嘅形勢，焗阿爺出手打救，放行白鴿黨嘅區議會方案。

中文唔掂兼擺官款

工聯會黃國健以「不忍卒睹」形容煲呔曾嘅表現，揶揄話余若薇應該好多謝佢，提供一個咁正嘅機會擔綱表演。富貴黨主席劉健儀則彈煲呔曾講嘢冇新意，常委田北辰直頭話，呢次辯論激起咁多人反對政改方案，今次真係多得煲呔曾囉！匯賢智庫葉劉淑儀更話，煲呔曾講中文好唔掂，「破格」講咗「出格」，「單打獨鬥」變「獨打獨鬥」，回應市民提問時又被人感覺擺官款，唔夠謙虛。