水警月初喺大埔截獲大批準備偷運入內地嘅港產六合彩報《創富》，本報踢爆，《創富》連同另兩份六合彩報《六合皇》及《貼士皇》經已靜靜雞改頭換面，轉咗承印人，但奇就奇在報刊註冊仍然維持原名。而更奇嘅係，本周一出版嘅三份六合彩報，報上刊登嘅承印人突然再次更改，變番同註冊資料一樣，即係淫賤黎擔任董事嘅公司──超企印刷及傳訊有限公司。三報承印人「明一間、暗一間」，兜兜轉轉，卒之又兜回原公司，如果話當中冇蠱惑，你信唔信吖？

正如法律界人士話齋，轉名背後一定有目的。乜嘢目的呢？呢三份六合彩報更改承印人，又冇向報刊註冊組申報，令人無法確認邊個係真正承印人，有意向三份彩報進行民事或刑事追究嘅人士，可能因為咁而無法索償，真正承印人亦因而有機會甩身。

明解嘞，淫賤黎鬼鬼祟祟、閃閃縮縮，原來係想瞞天過海，渾水摸魚，繼續播毒。係人都知，港產六合彩報走私北上，為禍神州，荼毒同胞，害到無數人傾家蕩產，家破人亡，早已人神共憤。呢，月初廣州有名男子持槍同警方對峙並駁火，最後被擊斃，死者就係地下六合彩嘅受害人，因為沉迷賭博而不可自拔，搞到傾家蕩產，卒之走上不歸路。查實，多年來內地畀彩禍害到家破人亡嘅悲劇多不勝數，呢位受害人不過係冰山一角咋。

彩禍害人，罄竹難書，而淫賤黎旗下公司承印嘅三份六合彩報正正係走私常客，咁多年來被人源源不絕運往內地，可以講係荼毒同胞嘅罪魁禍首。依家有人偷天換日，故弄玄虛，將承印人改嚟改去，唔使問阿貴，梗係敢做唔敢認，可能係做得虧心事多，怕遭報應啩。不過咁，人在做，天在看，無論淫賤黎玩乜嘢蠱惑招數，瞞得過人，瞞唔過天，多行不義必自斃，報應係遲早嘅事咋！

話時話，呢三份六合彩報承印人登記資料不盡不實，涉嫌觸犯《本地報刊註冊條例》，負責監管嘅影視處居然仲矇查查，直到傳媒踢爆後先至話要調查，再交畀律政司跟進，後知後覺成咁，擺明係嚴重失職啦。

除咗影視處監管失職，警方及海關堵截走私不力，亦難辭其咎。係人都知，不法分子長期將港產六合彩報走私北上，來來去去都係嗰班人，走私路線亦幾乎固定咁滯，只要執法部門肯做嘢，可以講係手到擒來，百發百中，點可能畀六合彩報源源不絕走私北上害人吖。

叮！呢啲殺人於無形嘅六合彩報喺本港合法印刷，非法出境，喺內地就變成非法入境，公然擺賣，甚至透過互聯網直接入屋，變成「一條龍殺人網絡」。兩地當局執法不力，甚至有人玩包庇玩勾結，簡直就係幫兇！