近日接連爆出有學校逼教師同學生參加撐政改遊行。同樣喺傳統愛國愛港學校—培僑中學畢業嘅「大專2012」成員周澄，原來喺讀書時都畀學校賣過豬仔，初中時佢糊裏糊塗被學校安排做義工，幫咗建制派區議會候選人拉票都唔知。
尋日周澄參加完「大專2012」遊行後憶述，九九年佢讀緊中一、二嘅時候，學校曾經安排佢同其他同學去做義工，話要幫區議會選舉嘅候選人拉票，有啲就去幫手做票站調查，當時入世未深嘅佢鑑於學校安排，不虞有詐，所以就去咗幫手，當然佢都係事後先至知道自己幫緊嘅係建制派候選人。咁係幫咗邊個呢？佢話依家諗極都諗唔起。
對於近期有學校逼教師同學生去遊行，佢覺得學校嘅做法好有問題。佢細個時有過被人賣豬仔嘅經歷，可能激發起佢嘅反叛，入咗大學後，特登要走去另一個極端。