金刀梁尋日約埋醫生朋友入沙田馬場食飯,講起邊類糉最好味,佢話:「我乜糉都食,有肥豬肉都唔怕。」仲話間唔中食幾舊,更覺滋味無窮。又難怪嘅,金刀梁連肚腩都冇,當然大把本錢啦!
本身挺住個肥肚腩、但近年瘦身成功嘅肥仔張都係「糉迷」,講起食糉心得就滔滔不絕。佢話屋企雪櫃內乜糉都有,佢偏愛鹹味糉,但動筷前會先挑走晒入面嘅肥豬肉,免得變成大肥佬。