唔講唔知，過去十五年，壹淫媒旗下刊物侵犯東方報業集團知識產權從未間斷過，累計竟達四十八次咁多，壹淫媒向東方賠償嘅金額合共超過三十萬元。壹淫媒死性不改，一犯再犯，真係天生賤格難自棄。

呢，最新一次侵權行為發生喺今年二月廿六日，壹淫媒旗下雜誌《忽然1周》刊登咗一輯有關內地女星趙薇嘅新聞，本來呢，搵明星嘅八卦新聞做賣點唔出奇，奇就奇在《忽周》所用嘅新聞相一啲都唔新，望真啲，原來又係「東方做，淫媒盜」，呢張相《東方日報》娛樂版舊年一月已經用過，證實圖文都係東方記者採訪所得。《忽周》不問自取，再次當堂斷正。

東方發現權益受到侵犯，即時透過律師向《忽周》發信，要求對方停止侵權行為，並刊登聲明公開道歉，簽署承諾書保證唔再侵犯東方權益，同時作出賠償。正所謂，錯就要認，打就要企定，《忽周》涉侵犯版權，人贓並獲，無可抵賴之下，惟有向東方賠償二萬元及支付一萬元律師費。但最好笑嘅係，壹淫媒仲死撐，聲稱有關相片由網上得到，唔知版權屬於東方，仲話可以喺互聯網隨意下載，唔係獨家相片喎。

叮，呃鬼食豆腐咩！作為傳媒機構，壹淫媒未曾查證相片版權誰屬就據為己有，仲要攞互聯網做擋箭牌，簡直係此地無銀三百両。正如香港互聯網協會副主席鍾宏安話齋，雖然互聯網無疆界，但要追尋相片源頭，技術上一啲都唔難。壹淫媒愈係詐傻扮懵，就愈顯得心中有鬼。

而更古怪嘅係，《忽周》仲夠膽話呢次只係「個別事件」，又拒絕承諾以後唔再侵犯東方權益。叮！壹淫媒旗下刊物侵犯東方知識產權嘅個案已有四十八宗咁多，咁都仲係「個別事件」？仲有吖，擅自盜用他人嘅相片斷到正，居然拒絕承諾以後唔再犯，等於一個賊仔偷嘢被人拉到，仲大大聲話唔保證以後唔再偷嘢，你話係咪卑鄙無恥兼無法無天呀？

講到無法無天，港府有法不依，包庇淫媒，縱容侵權，可以講係罪魁禍首。呢，壹淫媒一次又一次侵犯東方版權，受害人一次又一次向當局舉報，但包括警方、海關、廉署、影視處等咁多個執法部門，居然全部無動於衷，從來未見當局對侵權者採取過任何行動。咁多年來，東方惟有自己透過律師討回公道，花費咗無數人力物力財力。查實，法律界人士指出，有人以賠償方式和解，等於承認侵權行為，法理上已有足夠證據執行刑事檢控。當局對壹淫媒嘅侵權行為視若無睹，根本就係幫兇，唔怪得香港賊佬惡過兵，唔怪得淫賤黎橫行無忌啦。

叮佢個鎯鎯！香港自稱係乜嘢法治之區，港府仲聲稱要打造乜嘢創意之都添，真係笑死人。計太一叮話齋，香港法治有名冇實，創意之都就冇啦，侵權之都就有一個！