小白觀點：草木有情響應起錨

沙田一棵病入膏肓嘅大樹，前日突然拗腰壓落單車徑，有個單車客認真唔好彩，當堂扑到應，後腦幾乎被壓扁，延至尋晚不治。

嘿，康文署仲好意思死撐喺上月至憑肉眼檢查過棵樹，當時都冇事冇幹相當正常咁喎，咁就奇怪嘞，好好哋一棵樹，為乜會突然間跌落嚟呢？唔通草木有情，為咗響應煲呔曾嘅「起錨」號召，自己連根拔起？

樹有病，天知否？小白老弟非常支持沙田城門河畔一帶廣種櫻花樹，反正全部都係無王管，又唔知幾時冧，即使大吉利是被打到正，嗰一刻都仲可以氣若游絲咁哼住張敬軒嗰首《櫻花樹下》—「樹蔭有一隻蟬，跌落你身邊，驚慌到失足向前，然後撲入我一雙肩，現你月面腆—臉像櫻花萬千……」然後含住一泡血，狂噴喺櫻花之上。生死無常若此，你話係咪好淒美呢？

Email：sunsiupak@gmail.com

Blog：http://sunsiupak.blogspot.com

阿豪觀點：樹木辦有特異功能

赤柱古樹砸死美少女事件重演，沙田前日又冧樹，砸死一名單車客！嘩，唐唐個樹木辦到底搞乜㗎？咁都睇漏眼，唔通掛住起錨就乜都唔使做？

鬼咩，原來佢哋驗樹只係憑肉眼㗎咋！喂，中醫都講「望聞問切」啦，你齋望就知棵樹有冇問題喎，你估你係風水師可以睇到人哋嘅氣息咩！

講番呢個樹木辦吖，當初大家鬧佢疊床架屋，真係冇鬧錯㗎！嗱，冧樹意外第二日，咪又係由康文署出嚟解畫，仲好有型咁將所有責任攬晒上身。既然一早就係由康文署管晒，咁點解整個樹木辦出嚟呢？

不過香港人都慣晒㗎喇，早幾年煲呔曾咪又係做咗「清潔大隊長」，結果香港係咪乾淨咗，大家都有眼見啦！如果搞個辦公室就解決到問題，快手啲整番個「和諧辦」，咁咪天下太平囉！

Email：lukchiho75@hotmail.com

Blog：http://lukchiho.blogspot.com

網友觀點……

周仔：樹木辦靠唔住㗎，唐唐落區時唔好行咁近啲大樹呀！

阿木：風季就嚟仲唔處理好啲病樹，隨時又會造成傷亡！

四眼佬：用肉眼嚟驗樹，佢哋係咪有對X光眼？

樹蛙：樹木辦冇料到，應該同啲病樹一齊斬埋！