泛民上門圍攻建制派你就見得多，建制派倒番轉頭踩場又見過未？青年建仔主席周浩鼎尋日率領三名成員到白鴿黨總部「踢館」，促請該黨議員喺政改表決當日投下「良心一票」，支持政改。白鴿黨青年事務委員會亦早有準備，即刻招呼呢班稀客入房交流。
雙方起初只係重複陳腔濫調，點知講講吓，白鴿黨嘅徐遠華突然向建仔發炮：「你哋話自己『真誠為香港』，咁你哋嘅『真誠』係廉價定珍貴？對比民主派，咁多年你哋為民主做過啲乜？」青年建仔副主席張思晉惟有重申佢哋黨冇大佬文化，但有機制決定投票意向，仲話大家年輕人，要撇除意氣之爭理性討論。
佔有主場之利嘅白鴿黨雖然贏咗一仗，但其實係海軍鬥水兵，水鬥水。青委會主席莫兆麟事後竟然話，如果中央唔肯就一七及二○年嘅普選作承諾，黨主席鐵頭仁、前主席楊森同佢都唔會支持方案。鐵頭仁同其他白鴿黨議員呢期都話即使中央只接受佢哋提出嘅區議會方案，佢哋都會積極考慮支持，莫兆麟咁講，唔係冇跟緊最新形勢露晒底，睇怕就係公然同黨唱反調嘞！