賭王千金何超雲由頭到腳都係潮流指標，佢襯衫愛玩Mix and Match混搭風，揀衫平貴都啱，唔論價錢。呢排天氣悶熱，早前見佢同友人喺中環ifc四出搜尋熱褲，當時佢着上六吋紅色高踭鞋，下襯花花短褲晒修長美腿。
行行吓，超雲被ZARA嘅櫥窗吸引，打量十幾秒後就直入店內尋寶，無耐睇中一條淺藍色碎花熱褲，就好興奮咁走近鏡前比併吓，友人催促佢入更衣室試吓，佢擰頭話唔使，臨畀錢前，再揀多一條卡其色七分褲至去畀錢。之後，佢似乎未夠喉，行出門口後上多兩層去名店Juicy Couture再揀咗一輪，又再滿載而歸。
問佢係咪專登買性感熱褲畀男友一個驚喜，佢笑住擰頭話：「我平時都有買衫，唔係買嚟着畀男友睇嘅。」講起賭王有意去睇世博，超雲就話冇聽過，佢話天氣咁熱，就算想去都唔得啦！