立法會大會嘅議程規定有六條口頭質詢同十四條書面質詢，而口頭質詢整個程序，以一粒鐘至一粒鐘內完成為限。

白鴿黨嘅「高達」李永達早幾日去信內務委員會主席劉健儀，話按照呢個時限，依家一條口頭質詢嘅時間，包括提出、答覆同跟進在內，約為十五分鐘至二十分鐘，但係班問責高官喺第一輪答覆議員提出嘅質詢時成日長篇大論，為時甚久，搞到啲議員冇足夠時間提出各項跟進問題。換言之，即係踢爆兼投訴班問責高官狂噴口水花玩拉布，搞到啲議員唔夠時間問跟進問題，亦冇咁多時間糟質佢哋啦！

高達仲要求內委會商討立法會訂立規定，將每一條口頭質詢嘅跟進時間定於唔少於十分鐘，畀班議員有充足時間提出跟進問題同聽取回覆，令公眾更加了解政府喺各項公共政策嘅立場。咁即係議員跟進時間同班高官回覆嘅時間各佔一半。

既然經過高鐵撥款一役，內委會都有傾過防泛民拉布，呢次高達嘅建議擺明係以其人之道還治其人之身，等如唔畀班問責高官口若懸河，咪使旨意用拉布嚟甩身。