梁定宇喺致辭時話政府即將提交修改特首同立法會產生辦法嘅議案時，口快快將立法會講成「垃圾會」，搞到場面好笑兼尷尬，佢惟有笑笑口咁話「唔好意思」嚟解窘。

跟住輪到孫公上場，初時以喃喃自語嘅口腔發言，講講吓佢竟然話：「如果我哋唔好好把握二○一二年呢兩個選舉嘅發展機會，向前踏出一步，到二○一七或者二○一六、二○二○ ，我哋就冇可能進行普選！」

孫公呢個講法明顯同大家一直理解、今次政改方案通過與否都唔會係一七、二○年普選嘅先決條件有出入。可能孫公心知講錯咗，所以事後被追問時強調佢唔係咁講，仲話佢嘅意思係今次政改被否決嘅話，按循序漸進原則，下次要由頭開始再起步，總之就係難度好大啦！真係令人愈聽愈糊塗。

咁都不特止，有中學校長問點解特區政府用「起錨」兩字，而唔用「起航」、「啟航」等較接近書面語嘅口號時，孫公即時劃清界線，話呢個口號係負責公關嘅同事度出嚟，佢冇份參與，但估計可能「起錨」同英文版「Act now」音似意思又似，而且香港係一個島，四面環海，畀人同坐一條船嘅感覺，所以咪「起錨」、「Act now」囉！不過，新界九龍並唔係四面環海㗎噃！