商務及經濟發展局副局長蘇錦樑又學似煲呔曾咁，尋日晏晝靜雞雞走入長洲街巿食肆派起錨襟章，當中冇遇到任何示威者。跟住佢轉去出席長洲嘅龍舟熱身賽，充當頒獎嘉賓，上台仲乘機講兩句宣傳「起錨」。睇怕佢去到咁遠，都係想避過一劫啫。

另一邊廂，煲呔曾尋日喺政府嘅「起錨」facebook群組度，上載咗一段題為「最緊要做到問心無愧」嘅片。段片長兩分鐘，當中一半係煲呔曾落區時畀示威者包圍怒罵嘅片段，當中夾雜咗唔少以do do聲冚咗嘅粗口；另一半就係佢懶語重心長嘅「心底話」，慨嘆依家香港民主嘅情況就好似佢落區咁，畀人重重圍住動彈不得，令人好心噏，又反問自己點解咁蠢，明知畀人鬧都落區，但最後並冇提供答案。

不過成段片最經典嘅，係佢喺短短唔夠一分鐘嘅讀白入面，居然都前後偷睇咗六次貓紙。連拍廣告都要睇稿，呢啲咁嘅九流推銷員真係應該要炒啦！