立法會尋日特別發通知畀立法會議員，講番聽日CGO嘅特別保安安排，當中包括辯論當日全日，全部立法會議員嘅座駕都禁止進出停車場，睇嚟係防止有示威者坐議員車混入CGO準備抗議。

另外，由今晚十一點到聽日全日，無論議員、議員助理定記者，全部都要經CGO雪廠街入口出入，如果咁啱冇帶通行證，尊貴嘅議員都要核對身份證先可以入CGO。聽日仲要啲議員事先向行政署留低訪客姓名、活動時間、地點，如果唔係就要由議員或職員陪同先入到去，仲嚴過機場安檢，擺明杜絕任何人魚目混珠混入CGO，驚死畀啲示威者突圍入去踩場。

記者亦唔好得去邊。聽日全部記者都唔准同煲呔曾同余若薇同處一室，要困喺另一間玻璃工作室睇直播，可能驚記者聽到激氣得滯掟筆都唔定。而辯論後嘅記者會，竟然仲規限人數，規矩多到令人不敢想像！

監獄咁款淪國際笑柄

其實CGO自從舊年畀綠色和平成員突襲成功後，保安已經嚴密咗十倍，所有訪客出入都要登記身份證，依家保安再次升級，差在冇豎個牌出嚟話閒人與狗不得內進，令到堂堂一個本港權力核心變咗成個監獄咁，簡直係國際笑柄。

另一邊廂，辯論三人小組包括主持吳明林已抽出六條公眾問題。港台短短四日內收集咗二千八百幾條問題，當中三分二係衝住煲呔曾而嚟，完全反映到市民對煲呔曾有幾不滿。

「80後」反特權青年就話聽日只會喺立法會門外睇辯論直播，唔會鼓動其他人衝擊CGO，但煲呔曾依然封鎖晒成個CGO，可見佢真係好騰雞。