其實，要吸引外來孕婦，唔係話有病床就得嘅，最緊要有良好醫療服務，人哋山長水遠嚟生仔，仲要交咁多錢，都係想母子平安啫。食物及衞生局局長周一嶽吹水唔抹嘴，話本港有一流嘅醫療技術同人才，照咁講，接生手術咁濕碎，外來孕婦冇有怕啦。

之不過，如果佢噏你就信，咁你就太傻太天真嘞。嗱，尋日有立法會議員踢爆，近年本港醫院孕婦死亡或者嚴重受傷事件不斷增加，○八年有八單，舊年升到十二單，今年頭幾個月已經起碼有兩單。

有人話，周一嶽嘅卸膊神功無人可比，睇嚟冇講錯。呢，又發功嘞，佢面對議員嘅質問四両撥千斤，佢話喎，事故增加可能同內地孕婦來港產子有關，防止冇做產前檢查嘅孕婦來港分娩，事故就會減少咁話。

哦，原來都係內地孕婦嘅錯，佢哋唔嚟生仔乜事都冇，一嚟就事故頻生。咁就奇嘞，同一間醫院，點解本地人生仔就冇問題，外地人生仔就會出事？唔通內地孕婦副架生都有問題？仲有，如果連孕婦生仔都搞到冇命，邊個仲會信香港嘅醫療質素？咁醫療產業仲使唔使推動先？

叮！周一嶽指天篤地，都係為自己卸責啫。自從佢上台後，本港醫院醫療事故日日新鮮日日甘，開錯刀、打錯針、輸錯血，無奇不有。婦產科又點會獨善其身呀？最弊嘅係，出咗事，當局從來冇認真查處。正如有議員話齋，無論係公立醫院定係私家醫院發生醫療事故，內部調查都係自己人查自己人，直情係醫醫相護。咁搞法，點會有阻嚇作用呀！

衞生當局對傳染病疫情亦係懶懶閒，例如今次腸病毒襲港，二三月份周邊地區已大爆發，政府當冇其事。卒之感染個案大幅上升，達到十年新高，有一名護士死亡，當局至識驚，但驚還驚，仲係唔做嘢。周一嶽尋日宣布本港進入疫症高峰期，但又冇提出任何防疫措施，淨係話暫時毋須全港停課。話口未完，又有一個七歲小童懷疑由腸病毒感染併發腦膜炎，要入院治療嘞。

話時話，香港人真運滯，竟然碰上周一嶽呢種瘟神，其實捱得到今時今日，都要燒香還神咯。叮！