港協暨奧委會會長霍震霆兩個仔啟剛同啟山早前出席一個足球推廣活動，啟山係香港小型足球總會會長，亦都係足球嘅超級球迷，所以世界盃開鑼後，佢場場追睇，搞到把聲沙沙哋。
不過，佢爸爸已飛去南非睇波，見證咗開幕禮。咦！當地治安欠佳，遊客失竊同畀人打劫嘅事時有所聞，但啟山話爸爸未驚過。莫非霍公子自請保鏢？非也！啟山仲爆爸爸嘅自保之道，四個字講晒：「低調行事！」
啟山熱捧英格蘭，七月中仲會飛去南非睇半準決賽同決賽，最後二強之爭最想見到英格蘭同巴西對決，而哥哥啟剛就話自己冇細佬咁瘋狂，只係揀啲賽事嚟睇，英格蘭都係佢心水勁旅，但講到冠軍爭霸戰，佢最想睇巴西同西班牙對決！
講開又講，仲記得有次霍公子着住條Prada褲，同立法會議員落區巡視工地，搞到條名牌褲污糟晒都唔介意。原來啟山都係Prada擁躉，當日就見佢着住對Prada銀白波鞋。追求品味同時尚，兩仔爺一條心！