孔令瑜係社民連主席陶君行嘅老婆，兩公婆一向熱衷社運，仲一向都好敢言添。但孔令瑜日前喺公開場合上炮轟白鴿黨轉軚「×街」，仲對於普選聯「叫大家忍多兩屆功能組別」嘅言論爆多句「你老闆」，公然爆粗，究竟佢係忘記咗自己天主教徒嘅身份吖，抑或係用社民連主席夫人嘅身份講呢？

呢番言論會唔會引起教會方面嘅不滿就未知嘞，但肯定觸動到普選聯副召集人蔡耀昌嘅神經。蔡耀昌尋日喺街上呼籲市民星期日參與普選聯嘅遊行時，就忍唔住寸爆孔令瑜，話無論係白鴿黨定普選聯，都唔會講粗口，仲重申普選聯唔會放棄爭取終極普選嘅目標，叫大家唔好互相謾罵，曲解佢哋。

咁講，好明顯係要摑孔令瑜一巴，而事隔一日，相信孔令瑜可能已經知衰，事關佢尋日再見記者時已經唔係好想再講番當日嘅事，仲話佢當日號召市民七一包圍普選聯，純粹係佢自己嘅言論，唔關其他人事喎。