全城聚焦喺即將表決嘅二○一二政改方案，但其實一二年立法會選舉亦悄悄拉開戰幔！原來富貴黨已不動聲色為兩年後嘅選舉密密布陣，敲定「田二少」田北辰由九龍西轉戰新界西，延續前副主席周梁淑怡嘅地盤，嚟緊富貴黨將全力催谷田二少插旗新西。
田二少決定轉戰新西，原因有兩個。第一，新西議席多，每名候選人只要攞到百分八左右嘅得票率就有機會得米，加上群雄逐鹿，兵荒馬亂，新人較易突圍。第二，富貴黨一直有喺新西耕耘，莎姐敗走，肥水不流別人田，總得搵人繼承，阿田橫豎衝鋒陷陣，不如揀一個根基比較穩固嘅戰場，於是富貴黨決定要重新喺新西插旗，寄望田二少兩年後收復失地。
富貴黨已拍板為佢抬轎，「租積金運動」就係頭炮。「租積金」雖以富貴黨名義提出，但真正推手係田二少，而由尋日開始，佢就拍住主席劉健儀展開全港宣傳活動，密密落新西拉票，提早為一二年立法會選舉打定樁腳。