世界盃風靡全球，足球總會同香港賽馬會尋日乘勢宣傳暑假舉行嘅青少年足球推廣計劃，馬會行政總裁應家柏仲同大家講吓波經添！應總係德國人，德國隊世界盃初戰狂炒澳洲四比○，令佢喜出望外；但講到世界盃冠軍心水，佢除咗捧德國隊外，亦都好識做咁祝福港人熱捧嘅英格蘭能有好表現。梗係啦，可以推高投注額嘛！
老實講，應總後生嗰陣都係波牛，一九七○至七二年期間係西德十六至十八歲足球青年軍成員，漢尼斯同路明尼加等一代西德足球名將仲算係佢後輩，認真威威。佢話當年踢中場指揮大局，後來為咗升學先毅然放棄踢波，轉攻賽馬，終於修成「波馬雙絕」。
佢喺活動中見到班足球小將，一時技癢同佢哋圍圈搓波，功架尚在。雖然佢冇做職業足球員，但都寄語依家嘅小朋友好好享受足球，遠離毒品、酒精同吸煙等不良嗜好。