眾所周知，立法會金融服務界議員「金勞詹」詹培忠賭得兩手，自稱「賭仙」嘅佢喺拉斯維加斯閒閒地都贏過千萬元，但有佢DNA嘅囝囝Ricky詹劍崙就話自己冇遺傳到爸爸嘅高明賭術，所以佢依家幫屋企打理金融投資公司，仲直言不賭也罷，如果唔係就會變成爛賭仔。
Ricky大讚爸爸係一個特別嘅人，賭術高之餘亦相當有膽識，佢真係自愧不如。佢第一次入賭場係讀大學嘅時候，當時入去拉老虎機，一開始就好好彩中咗五十倍，點知最後都係輸番出去，自此佢就唔再愛賭，所以咁多年嚟，就算同爸爸一齊去旅行，佢都唔會跟爸爸入賭場。
雖然佢唔入賭場，但係以香港名人第二代作為骨幹嘅幾個青年團隊，佢就有興趣加入，好似好多老友都係成員嘅菁英會同青聯佢都會考慮。
睇真啲，Ricky同爸爸真係好似樣，但佢就fit好多，佢話因為好鍾意做運動，而且亦食得好清淡喎！