收到風話，公社兩黨攪局唔止着眼於立法會補選，原來補選只係變相「公投」嘅第一波，佢哋仲野心勃勃咁諗過再下一城，策動「公投」第二波。據聞係社民連三子黃毓民、陳偉業同梁國雄建議將戰線擴大到出年嘅區議會選舉，好似撒豆咁派人出選四百個直選議席，只要總票數超過五成，咁就等如「公投」成功嘞！

嘩！真係好大想頭喎。聽聞社民連嘅如意算盤係咁打嘅，一來派新人落區選可以吸「80後」嘅選民支持，二來政府每票資助十蚊，斷估班新仔都應該攞夠票，唔會被沒收按金嘅，成本低、效益高，諗得過喎。

派新仔落區自掘墳墓

真係發夢都冇咁早，後來佢哋發現只係喺度發緊白日夢。事關立法會同區議會選舉性質唔同，唔係就咁嗌幾句爭普選嘅虛話就能夠瞞天過海，況且有好多地區堡壘係攻唔破嘅，建制派嘅鐵票又撬唔到，派新仔落去選盞燒錢，輸晒事小，印證咗「公投」失敗事大。

再講，若果四百個議席都派人選嘅話，泛民內部都會撞區，又會掀起不絕嘅協調爭拗，仲有就係會分薄泛民嘅票源，唔單止係自己捉蟲，簡直就係自掘墳墓。

誠如白鴿黨核心形容搞「公投」等如跳樓，依家篤爆計算機都係有蝕冇賺，根本冇得玩，社民連梗係淆底，唔敢跳多次樓喇！

雖則縮沙唔推「公投」第二波，但佢哋不嬲有鋪攪局癮，唔攪唔舒服。聽聞佢哋派新仔出選區議會選舉，但主要都係做纏擾工夫，牽制某建制派啲候選人，到時仲會喺咁意嗌吓「解放」、「爭取真普選」咁，點都要搞啲噪音出嚟。