小白觀點:難保煲呔曾銅像獻世

中文大學內應唔應該豎立孫中山銅像，眾說紛紜，不過小白老弟就非常支持劉遵義嘅英明決定，都係繼續留係儲物室內蒙難好。係人都知，孫中山先生並唔係《再別康橋》作者，亦從未見過佢當眾用iPad演奏一曲。

好明顯孫中山係一個政治人物，本住「政治中立」嘅大原則，今日放得落孫中山像，難保有日煲呔曾用公帑打造自己嘅銅像，跟住三司十幾局當然唔執輸，一人整一個放入中大校園，搞到百萬大道好似擺晒兵馬俑咁，真係成何體統呀！

此外，孫中山崇日，原來佢旅居日本時，特登起咗一個叫「中山樵」嘅日本名，佢又同黑龍會交往甚密，套用現代用語，好易畀人標籤做「借助境外勢力陰謀顛覆國家」，校園豎立中山像，搞到人哋以為中大就係「中山樵大學」，英文變成Japanese University of Hong Kong，叫中大人情何以堪呢？

Blog:http://sunsiupak.blogspot.com

阿豪觀點:孫中山貢獻長存心中

有人話，中大患咗一種罕有嘅「雕像恐懼症候群」，睇嚟一啲都冇錯。繼早前個新民主女神像，搞到劉校長一頭煙之後，今次又輪到孫中山先生銅像。真係i爆頭都唔明，孫中山先生又唔係咩有爭議性嘅人物，無論左中右都一致推崇，再加上佢同香港又真係好有淵源，既然個新民主女神像，話唔擺話唔擺，結果都係要擺，點解中大到依家都係唔嗲唔吊呢？

不過算啦，人哋戇居係人哋嘅事，豪伯反而想探討吓一個問題：到底一個人物立咗像，係咪真係會令世人記得佢呢？嗱，好似話皇后像廣場夠有個銅像啦，大家朝見口晚見面，又有幾多人知道銅像嘅主角昃臣爵士，究竟有咩事迹呢？唔講大家仲可能以為係唔知邊任港督嘅銅像添！所以話呢，一個歷史人物能唔能夠被後世傳頌，並唔係取決於佢有幾多銅像傳世，相信孫中山先生對中華民族嘅貢獻，會永留中國人心中！

Blog:http://lukchiho.blogspot.com

網友觀點

小　山：神像銅像應放喺心，擁有民主心勝過得把口嘅民主騷！

老　趙：學生會係咪冇讀中史？點解唔幫口撐孫中山銅像？

大　雄：唔豎立喺校園可能基於保安問題，怕咗班偷鐵黨囉！

同　志：放喺歷史博物館就最合適啦。