大家應該估得到，實係涉嫌濫藥駕駛啦。冇錯，警方截停架車後，拉咗一個三十五歲男子，喺佢身上搵到Ｋ粉，哈，佢個鼻仲有白色粉末，睇嚟係啱啱high完。佢只有學車牌，攞人哋架車喺公路亂衝亂撞，冇死人已經算好彩。

濫藥駕駛同醉駕一樣都係高危動作，司機high藥後，連阿媽係邊個都唔記得，架車喺馬路上舞龍咁舞，隨時車毀人亡。舊年底，有個的士司機索K後開工，架車撞完燈柱撞石壆，撞到溶溶爛爛，司機被困車內周身傷。

索Ｋ司機被判入獄年半，停牌兩年，可惜根本冇阻嚇作用，判決後一個禮拜內就發生咗五單懷疑索Ｋ危駕造成嘅交通意外。今年個案更係直線飆升，年初到依家已有三十一單，係舊年嘅五倍多。

政府高官下巴輕輕，話要對索Ｋ危駕零容忍。點知講還講，做又係另一回事。現行法例規定，除非司機自己承認吸毒，而警方亦證實車裏面藏有毒品，先至可以要求司機驗毒。對於咁嘅戇居法例，膽生毛嘅迷幻司機梗係當你冇到啦，政府居然從來冇諗過修例。

藥後駕駛愈演愈烈，市民冇晒安全感，紛紛要求政府打擊。可惜民急官唔急，政府高官話喎，年中會就賦予警方抽驗司機嘅權力諮詢公眾。大佬呀，立法會舊年五月已經追問藥駕問題，至今超過一年，政府家陣至話計劃諮詢，遲唔遲啲呀？叮！

其實，要立例唔係咁難啫，有議員建議將藥駕納入打擊醉駕條例之中。有道理喎，早排修例授權警員要求懷疑醉駕司機吹波波之後，醉酒駕駛個案少咗好多，咁點解唔可以用同樣辦法打擊索Ｋ司機呀？

政府嘅回應都幾搞笑，佢哋話，暫時未有相關測試方法嚟證實司機有冇濫藥，所以要參考外國經驗，解決咗技術問題先至研究立法。政府唔係成日吹水，話要發展創新科技產業咩？唔通連測司機有冇濫藥咁嘅小事，本港都解決唔到？錯！香港絕對唔係冇人才，早排就有大學發明咗用頭髮驗毒嘅新技術，區區驗藥技術更不在話下。講到底，政府唔係做唔到，而係根本唔想做。

政府對交通安全，不嬲都好似一碌四方木，推一推先至郁一郁，對醉駕係咁，對藥駕又係咁。今時今日，索K揸車引發嘅事故時時發生，全港公路布滿計時炸彈，分分鐘連環爆炸。難怪有立法會議員狂批，政府忽視藥駕屬於失職，完全唔可以接受，唔通要等到藥駕司機撞死高官先至立法？叮！