世界盃本周開鑼，香港青年聯會主席陳仲尼（Rock）同東華三院主席梁定宇早前出席一個公開活動，都不約而同講波，話好鍾意睇波。阿Rock仲話最喜歡強隊，邊隊強就捧邊隊，咁樣容易投入啲，佢仲即場約埋梁定宇去佢屋企作客兼睇波，話汽水、零食無限量供應喎。
講開睇波，好自然會令人聯想到賭波啦，唔知身為香港青年聯會主席嘅佢會唔會擔心十歲同七歲嘅囝囝有樣學樣呢？阿Rock就話冇有怕，皆因自己同朋友嘅仔女大部分都係讀埋同一間學校，囝囝有咩事都會講畀同學仔知，啲同學仔又話畀自己爸爸媽媽知喎，最後咪又係走番入佢耳仔！有呢個層層緊扣嘅關係網，難怪Rock咁放心，唔驚囝囝行差踏錯啦！