香港紅十字會計劃喺西九龍填海區興建新總部大樓，需要撲水三億元。尋日紅十字會喺會展舉行六十周年慶祝酒會，好多城中名人參加，「千億新抱」徐子淇同老公李家誠齊捐三百萬蚊，仲應紅十字會總監胡郭秀萍邀請，擔任新總部大樓籌委會成員，幫手募捐。
子淇行善不忘為李家再添丁，佢開到口話出年生番個「兔仔BB」，所以希望今年底再度懷孕喎。子淇尋日着住一襲Versace紅裙，輕易成為全場焦點，講起年幼嘅囡囡，子淇一臉滿足話，湊女生活好幸福，不過，大女晞彤間學校有小朋友感染手足口病，令佢好擔心，囡囡每日放學返屋企，都會細心為佢檢查手仔同口腔，幸好晞彤抵抗力強。
玩具大王蔡志明太太蔡李惠莉亦捐出二百萬，蔡生見太太咁熱心公益，尋日與千金加怡、公子加讚齊撐老婆。到場撐太太嘅合和主席胡應湘尋日都捐出一百萬蚊支持新大樓落成，而「影業大亨」邵逸夫亦捐出一億元。
咁多善長排住隊送支票畀紅十字會，負責新總部大樓籌款嘅胡太話感激不盡，但係都要再籌多一億九千萬至夠錢埋單，希望港人繼續熱心捐助。興建總部嘅計劃明年底就開工，預計二○一四年初落成。