本文重點
香港近年大講文化、藝術，又要發展創意產業，不過，呢啲努力係咪可以洗脫「文化沙漠」嘅污名都好難講，事關政府由四月開始搞嘅「添馬艦公眾藝術計劃」，即係邀請各界提交藝術作品放喺將來嘅政府總部。呢個本來係藝術人揚名立萬嘅好機會，但係兩個月過去，依家只係徵集到兩件藝術品，搞到計劃負責人兼著名建築師嚴迅奇好頭痕，唔知佢陷入沉思嘅樣會唔會激發本地藝術家一啲創意呢？
嚴迅奇唔睇政治涵意
當局本來希望喺添馬艦休憩用地上安放八件由本地藝術家創作嘅藝術品，但個計劃到今個月二十八號就截止，竟然只有兩件參賽作品，搞到添馬艦發展工程建築師嚴迅奇，尋日同埋香港藝術館總館展鄧海超一齊露面催谷，佢哋話擺放上址嘅藝術品一定會成為香港地標。
嚴迅奇仲拍心口話，評委揀選參賽作品時，只會從藝術角度去評審作品，即使件藝術品有政治意涵都完全冇問題，真唔真呀？
唔講唔知，立法會依家都為新大樓籌集緊藝術品，佢哋截止日期又係六月廿八號，預算徵集最少十二個作品，預算製作費就由一百萬至二百五十萬不等，但咁啱又只係得兩個報名喎。
兩個計劃都觸礁，香港唔通真係文化大沙漠？