城中青年才俊組成的百仁基金前日換屆，創會主席李家傑功成身退，「升呢」做百仁榮譽兼創會主席，副主席施榮忻（Jamie）正式接棒。李家傑一手湊大百仁，成功帶起年輕才俊走近群眾嘅風氣。忙咗兩年，個會漸上軌道。
集城中富豪同名人二、三代組成嘅百仁基金辦喜事，一眾副主席及成員梗要齊齊到賀。Jamie擔大旗，施爸爸、施媽媽同三位哥哥都嚟齊。李家傑對卸任依依不捨，希望百仁發揮集思廣益精神，聯合起嚟向弱勢社群伸出援手，李公子雖然已卸任，仍然拍心口繼續撐班兄弟。
講番百仁，會員人數直線上升，已招收咗六十個香港名人會員，個個非富則貴。Jamie話，嚟緊想擴闊會員層面，收埋中國內地同台灣會員。係人都知百仁入會費勁，創會會員費高達五十萬，其他會員亦要五萬，新增會員都唔會降低門檻喎。不過Jamie強調，誠意最重要，事關百仁精神唔係鬥捐錢喎。