新界社團尋晚舉行聯會廿五周年會慶，中聯辦主任彭清華（圖）都有出席，我哋見佢精神咁好，即刻請教吓佢強身健體嘅秘技，彭主任話佢打乒乓球鍛煉身體，但最重要都係保持樂觀心境，講講吓，佢仲約記者得閒PK吓添。
「PK」？彭主任話佢唔知「PK」喺香港嚟講近似粗口，因為呢個簡稱喺內地好受歡迎，有對決、比試嘅意思，相當正面，但依家知「PK」喺香港有第二個意思，以後會小心啲用。
富貴黨主席劉健儀尋日都有出席同一場合，仲有之前搶官員咪嘅富貴黨西貢區議員方國珊（哪吒），劉健儀早前對哪吒冇問過個黨咁落力撐政府有微言，但尋日兩人碰頭已冇再提，哪吒話佢有個助理嗰日混亂中懷疑受傷，劉健儀仲叫哪吒畀佢放假添。
