願與所有同事孭責

本月初，中大舉行行政與計劃委員會會議，沈祖堯因為唔喺香港，避過咗當日否決接收新民主女神像及六四浮雕嘅決定，事後佢話會同學生好好溝通，營造出佢同中大管理層對事件有唔同立場嘅形象。日前，佢又同傳媒茶敍，期間大談中大當日嘅決定「唔成熟」，仲話七月上任後女神像擺喺邊、擺幾耐都可以傾，即時贏得學生會掌聲，仲發聲明讚佢勇於承擔添。

點知，茶敍結束後唔到幾個鐘，傳媒已經收到沈祖堯嘅補鑊聲明，乜嘢事咁緊張？沈祖堯喺聲明中劈頭就話：「我作為行政與計劃委員會成員，我們是一個團隊，有關行政與計劃委員會的決定我一直知悉及支持，我亦會與所有同事共同承擔責任。」佢強調知悉六月二日中大發出嘅聲明，亦同意當日嘅立場，仲間接為「唔成熟」言論降溫，話「事後看來，我覺得我們由於經驗不足，時間短促」，未能夠更清楚解釋會議討論嘅考慮因素，臨尾仲補多句「但事實上，我們所有同事已為整件事作出最大努力」。

份補鑊聲明一再肯定中大管理層及「同事」嘅決定，如果話沈祖堯冇受到任何壓力，真係冇人信。另一個焦點人物劉遵義尋日出席行政會議時，就被問到有冇留炸彈畀下手？佢話「完全冇」，又唔肯回應沈祖堯嘅「唔成熟」言論，只寄語下一階段同學生嘅討論可以和平、理性，仲呼籲要「相忍為校」。一個女神像，搞到現任校長勢灰溜溜卸任，繼任校長則騰騰震接棒，似乎校長先係今次衝突嘅輸家。