小白觀點:搏到最後 行家等跟尾

《太陽報》大革新，一改暢銷報章搶早紙嘅傳統，編採人員唔瞓都要為讀者搏到最後一秒，為讀者提供全方位、最及時嘅新聞資訊服務，前日率先爆咗單「腸病毒殺入娛圈，張學友全家中招」！果然不同凡響，搞到其他行家要遲足一日跟新聞尾，真係唔好意思。

尋日仲勁，你去報攤望望，暢銷報紙都係賣全國人大常委會副秘書長喬曉陽講政改，之但係睇《太陽報》呢，你一樣會睇到「喬老爺」，但此「喬」不同彼「喬」，呢位「喬老爺」係蘋果電腦話事人喬布斯，介紹全球人類最關心嘅iPhone 4。咁就梗係啦，人哋嘅發布會係美國時間，即係香港凌晨時分，其他報館行家洗手等收工，當然趕唔切啦！美國喬老爺有嘢宣布，即刻成為城中話題，唔睇《太陽報》，第二日同朋友同事食飯，連搭句嘴都唔得，你話幾冇癮吖！

Blog:http://sunsiupak.blogspot.com

阿豪觀點:獨家堅料還看《太陽報》

正所謂「立竿見影衝破黎明《太陽》首勝繼續革命」。《太陽報》開創本地傳媒先河，一改暢銷報章搶早紙嘅傳統，將出版時間延遲到凌晨三點，務求為讀者搜羅更多最快最新嘅資訊。話口未完，革命初嘗勝果嘞。呢嗱，學友全家中招染腸病毒呢單堅料，就係《太陽報》獨家搶先報道㗎嘞，所以各位讀者記得繼續捧場啦！

網上見到好多讀者有唔同意見，其中有唔少都係好富創意嘅，豪伯感受到讀者拳拳愛護之情，睇完都忍唔住感動到有啲眼濕濕呀！

講番《太陽報》革新吖，唔知大家有冇發覺依家啲報紙愈出愈早，已經好難搵到「今日」發生嘅事咯，有時甚至會講番「前日」嘅事添，咁搞法，我不如睇《香港年報》好過啦！所以老土啲都要講番句㗎嘞：想第一時間知家事國事天下事，《太陽報》係你必然之選！

Blog:http://lukchiho.blogspot.com

網友觀點

牛　佬：如果《太陽報》開個專欄信箱，由豪伯負責幫讀者解開心結，咁就好喇……

裝醒哥：多啲追擊類似撞胸阿叔咁嘅猥瑣佬吖，睇得好過癮㗎！

安察駱駝：最好搵比利個烏鴉口提供足球貼士，讀者對住買實贏唔少！

周　仔：其他報章實會跟風，隨時搞到鬥遲出版！