呢嗱，就咁，太一叮尋日向各位尊貴讀者報告過啦，《太陽報》再起革命求新求變，衝破黎明猛料增值，不惜打破暢銷報章千篇一律搶早出版嘅格局，犧牲早紙時間延遲出版，務求為讀者提供全方位、最及時嘅新聞資訊服務。言猶在耳，立竿見影，延遲出版爭取黃金時間嘅精心部署即刻發揮龐大威力，大家一定睇過尋日嘅獨家頭條報道：腸病毒殺入娛圈，張學友全家中招！

呢一單咁震撼嘅猛料，一來固然係名人效應城中話題啦，二來咯喎，喂，腸病毒冇眼o架，張家中招即係告誡世人，七百萬同胞一樣有機會染病，最好做足預防措施。唔好唔記得，張太羅美薇聽講係有嚴重潔癖嘅，連佢都感染腸病毒，仲係全家病情最慘烈嗰個，你話係幾咁得人驚！

《太陽報》呢次強勢出擊馬上有料到，你話嘞，花香又點可以唔讚呢？所以話啫，太陽當空照，人人齊歡笑，《太陽報》讀者絕對可以足不出戶能知天下事！

咦咦咦，咪住先，再起革命提供猛料當然唔止咁少啦，記唔記得太一叮尋日講過，南非世界盃係延遲出版嘅重點報道項目之一？雖然未開波，已經有料到，你睇其他報紙未必睇到，你睇《太陽報》就會知道，一場尼日利亞對北韓嘅熱身賽搞到人踩人，至少十五人受傷！

你知啦，世界盃可以話係成條地球村最關心嘅體育盛事，幾十億對眼睛到實一實，可惜南非同香港時差六粒鐘，如果按照傳統時間截稿，讀者會損失好多寶貴資訊。《太陽報》就唔同嘞，投入大量人力物力不惜犧牲睡眠時間都要為讀者打拚到最後一秒鐘，等大家一覺瞓醒即刻全盤掌握戰況，淨係呢一份誠意都值得大家豎起大拇指讚嘆一句：好波！

《太陽報》創刊十一年，讀者人數節節上升至最新嘅接近一百三十萬，銷量穩佔全港第三位，原因係乜呢？講出嚟一字咁淺，只要做得好，人人當係寶。容許太一叮向一百三十萬讀者講一百三十萬句：多謝！

再起革命衝破黎明剛剛開始，如果要做一個小結，可以咁講，首嘗勝利，繼續革命！

既然繼續革命，太一叮提提你，《太陽報》唔止可以睇到華爾街開市消息，連中午收市行情亦一覽無遺，投資者梗係更加勝券在握啦！