小白觀點:出動蟲鼠組清理市容

煲呔曾又帶埋成班嘍囉落區sell政改，去到邊畀人噓到邊，由本來皮笑肉不笑成條殭屍咁款，到後來面都黑埋發老脾。其實佢老人家都好慘，你估佢自己唔知自己事咩，問題係佢實在冇乜政治智慧，既然有Head Count請人，為乜咁霎戇用近十皮嘢搵個磨碌返嚟做影印機？請個似自己嘅人返嚟做替身擋箭好過啦！

仲有喎，煲呔曾又話要走向群眾，好人好姐做乜要搵咁多G4圍住？如果心虛嘅話，點解咁笨唔請成班新舊八模兵團做實Q？示威者嘅怒火當堂變成慾火，立即顧住起錨衝擊口靚模，睬煲呔曾都有味。

不過小白老弟認為嗰日小市民嘅舉動，確係有啲唔係好啱，下次見到煲呔曾同成棚司局長捐出嚟，應即刻向食環署打小報告，唔使摷條乜鬼娛樂場所條例出嚟咁麻煩，只要出動防治蟲鼠組，當班高官係過街老鼠係咁打就啱喇！

Blog:http://sunsiupak.blogspot.com

阿豪觀點:心胸狹窄勿接觸群眾

煲呔曾話政改「玩鋪勁」肯定係搵笨，但佢個起錨爛騷就真係屢敗屢戰，一副豁出去嘅架勢。呢嗱，佢上禮拜日又拉大隊周圍sell嘢喇，結果係點唔使多講啦，又係去到邊畀人噓到邊！

唔知係咪吸收咗之前嘅經驗，今次可能請多咗好多撐佢嘅民眾，煲呔曾發表演講時，下面就有班市民喺度跟住嗌「起錨」。哈，咁搞法，不如索性搞番場「起錨鬥唱山歌音樂會」吖笨。

最好笑嘅係，煲呔曾並唔滿足於同反對嘅市民鬥大聲，佢仲要發老脾，叫群眾「話畀佢哋聽佢哋係少數，我哋先係多數！希望佢哋唔好再阻住巨輪前進！」

唉，真係唔明煲呔曾點諗，心胸狹窄就咪出嚟接觸群眾啦，盞自己露餡！呢一幕令豪伯諗起早排白高敦拉票時，唔記得自己未除咪，結果鬧人嘅說話出晒街。不過咁喎，白高敦係衰大頭蝦啫，起碼對住選民都扮吓嘢，好心曾爵士學吓人啦！

Blog:http://lukchiho.blogspot.com

網友觀點

春仔：國內同胞食咗咁多毒嘢都面不改容，值得研究！

阿呆：啲奸商咁創意無限，用喺正途咪好囉！

狒狒：應該統計吓依家嘅中國人係咪較以往短命。

傻伯父：呢啲毒油都唔知有冇流入香港，諗落都驚！