就嚟又到暑假，又係時候出門充吓電嘞。立法會會計界前議員Eric李家祥呢趟搞搞新意思，七月將勇闖外蒙古大草原，體驗瞓蒙古包、冇廁所用嘅滋味。咁辛苦為乜？原來係為咗參加一年一度嘅蒙古盛大節日「那達慕大會」。
Eric前日拖埋老婆、囡囡入沙田馬場湊熱鬧，但鍾意睇賽馬嘅唔係Eric，而係囡囡至真。為咗睇馬，一家人將會闖蕩外蒙古大草原，欣賞駿馬奔馳嘅壯觀場面。Eric話呢個主意由囡囡提出，講明係辛苦團，佢同太太起初都猶豫咗一陣，但諗深一層，難得囡囡唔嫌父母麻煩，仲做埋領隊，捱吓苦都值得。
李太話「那達慕大會」係當地最盛大嘅節日之一，屆時將有摔跤、騎馬同射箭比賽，蒙古人會穿上節日盛裝，頭包彩巾，一片熱鬧歡騰。不過去外蒙古每人只可帶少於十五公斤嘅行李，Eric話打算帶舊衫去，一路玩一路揼衫，以騰出空位買手信喎。