工聯會立法會議員KK黃國健尋日試圖幫大聯盟嘅召集人、工聯會會長鄭耀棠解畫，話雖然工聯會都唔係太鼓勵呢種「利誘」做法，但其實香港左中右嘅團體周不時都會咁樣做喎，仲點名話職工盟早前都係同班街坊一齊飲完茶先去五一大遊行添。

KK話通常啲旅行同聚餐活動一黐得近，佢哋就會一齊做，所以先會有呢啲情況喎。之但係，雖然「旅行」同「遊行」只係差一個字，但性質就差天共地，大纜都扯唔埋，KK咁樣幫工聯會解畫，似乎牽強咗啲噃！

煲呔曾日前同問責團隊落區「起錨」，最後畀班市民狙擊到「拋錨」收場，可見大眾嘅力量絕對唔可以睇小。工聯會喺遊行前夕爆出連串醜聞，理應係嚇到鼻哥窿都冇肉先係㗎，點知KK竟然話未驚過，仲好大口氣咁講：「佢有幾多人可以嚟圍我哋先？係咪真係可以Call到五十幾萬人嚟踩場先？係就佢哋本事囉！」

嘩！KK咁講好似擺擂台咁，大有叫人「放馬過嚟」嘅意味，但係咪真係咁淡定呀？因住到時「撐政改」遊行最終都係得個亂字呀！