08/06/2010

播放本新聞相關短片

政情:林健鋒約定梁君彥睇世盃

世界盃就殺到,立法會內好多都係波友,當中包括經濟動力嘅Jeffrey林健鋒同Andrew梁君彥。

尋日喺中環撞到佢兩個啱啱食完飯,問起佢哋會唔會去南非感受吓現場氣氛,Jeffrey話現場就唔會去喇,佢選擇留喺屋企歎冷氣睇直播;Andrew都係一樣,冇打算去南非睇波,打算留喺香港睇,不過原來佢屋企冇裝有線電視。Jeffrey一聽到,即時拍心口話冇問題,話會預埋Andrew去佢屋企睇波,兼包埋零食飲品,佢仲強調屋企嗰部係高清大電視添。呢個兄弟都算唔話得。

唔去南非,Jeffrey依家構思緊個「亞洲之旅」,打算喺立法會休會期間去幾個亞洲國家觀光,實際地點依家仲考慮緊。Andrew就話喺休會期間會留喺屋企抖一抖,同埋打理吓家族生意。