話說十幾年前李少光仲係入境處處長時，有次赴內地做嘉賓，同內地高官一齊揮筆題字，點知人哋字字秀麗，佢自覺手字好曳，返港就的起心肝搵老師，咁啱孫公學緊，就將老師介紹畀佢。睇嚟臨近農曆年搵兩位局長寫揮春，李少光寫「出入平安」，孫公寫「學業進步」就啱數嘞！

李少光話寫字時要靜，做入境處處長期間，佢趁食晏苦練兩粒鐘，差啲畀人誤會佢閉門批示被拒入境名單；其後調任做廉署一哥，仲曾經公開書法成果。可惜做咗局長後「靜唔到」，唔通做保安局個心好亂？佢話唔係，係閒落嚟嘅時間都冇，兩粒鐘都好奢侈。