對於中大以政治中立為由拒絕女神像入校，佢指「唔係最好嘅處理方法」，亦未夠成熟，承認校方低估外界反應，但佢係團隊一分子，有份承擔責任。佢話發表聲明前，曾發電郵向校方講措詞值得斟酌，建議轉用「未能夠達到共識」，但最終冇被採納。佢表示中大要從中學習，但重要嘅係大學應該跟政治爭拗保持距離，又話唔想做高調嘅校長喎！

佢又話發生六四事件時，佢正喺加拿大攻讀博士，感到痛心疾首，曾諗過返港，又流過眼淚，傷心到連工都返唔到，要請一個禮拜假。至於平反六四呢個問題，佢只係重複話「歷史會有公斷」同「公道自在人心」。

中大學生會發表聲明讚沈祖堯勇於承擔，踩現任校長劉遵義唔肯同學生溝通，又提到校方從未向學生會表達有關保安問題嘅立場，佢哋希望日後可以用公投決定民主女神像嘅去留而原定今日喺中大校園豎立的六四浮雕，因技術問題需要押後豎立儀式。

咁學生會算係收貨啦！勢估唔到沈祖堯未上任就要幫劉遵義拆彈，咁又係嘅，因為安全拆彈即係救自己嘛！